Funsionáriu Senior ka jestor senior mak ema hirak ne’ebé tamba iha kapasidade no esperensia tuur iha nivel aas ka topu estrutura burokrasia nian nudar xefi ba dirasaun, departementu ka unidade iha ministériu ida nia laran. Sira halo sira nia kna’ar iha ambiente ida nakonu ho kompetisaun polítika no prioridade ne’ebé kompleksu tebes. Sira sai nu’udar agent of change, agent of transformation, sai proponente no hamrik iha liña oin (vanguarda) kedas hodi halo mudansa ka transformasaun iha prosesu dezenvolvimentu nasional liu hosi implementasaun polítika no prioridade governu eleitu nian.
Nudar xefi, jestor senior sira nia papel importante mak traduz ka konverte mandatu polítika governu nian ba iha planu, programa, no atividade dirasaun no departementu nian. Jestor senior sira mós sai nu’udar lider ne’ebé iha integridade, inisiador, inspirador, motivador ba staff sira hodi asegura implementasaun planu ho programa hirak ne’e la’o ho di’ak, to’o rohan no hetan susesu duni.
Jestor senior iha sira nia serbisu lor-loron la’os de’it haree ba nessesidade internal organizasaun nian, maibe mós iha fleksibilidade, kreativu, inovativu hodi kolabora ka serbisu parseria ho dirasaun seluk iha governu nia laran, orgaun estadu sira seluk, parte interesadu (stakeholder) sira, komunidade, seitor privadu, organizasaun sosiedade sivil nian, no parseiru internasional. Hodi nune’e bele asegura rekursu hirak ne’ebé iha no limitadu atu utiliza ho efikaz no efisiente liu hosi prestasaun serbisu ka atendimentu ne’ebé lalais, nakloke, no responsabilidade.
Tamba ne’e jestor senior sira tenke iha kapasidade (kuiñesementu no abilidade) ida ne’ebé natoon (adekuadu), atitude no komportamentu di’ak, hanoin estratéjiku lideransa nian, visioner, atu nune’e bele presta sira nia serbisu tuir duni kna’ar ka responsabilidade ne’ebé governu fó ba sira no espetativa hosi públiku ba sira.
Tidak ada komentar:
Posting Komentar